Friday, April 3, 2015

Jamii Forum watka haki katika muswada wa Sheria


Mratibu wa Taifa wa Mtandao, Onesmo Olengurumwa (katikati), Mkurugenzi wa Jamii Forum Maxence Melo (kushoto), pamoja na Mkuu wa Mradi- SIKIKA, Patrick Kinemo, wakizungumza na waandishi wa habari jijini Dar es Salaam


Afya ya Gwajima ya waenyesha Polisi



HALI ya afya ya Askofu wa Kanisa la Ufufuo na Uzima, Josephat Gwajima, imebadilika ghafla baada ya kushindwa kupanda ngazi katika ofisi za Kituo Kikuu cha Polisi Kanda Maalumu ya Dar es Salaam jana.
Askofu Gwajima alifika kituoni hapo saa 2 asubuhi akiwa ameongozana na maaskofu zaidi ya watano.
Katika hali ya kushangaza, wakati akipanda ngazi kuelekea kwa Mkuu wa Upelelezi wa Kanda Maalumu ya Dar es Salaam, alifanikiwa kupanda mbili, lakini alipojaribu ya tatu alishindwa.
Baada ya kushindwa kuendelea kupanda ngazi, aliwaomba wasaidizi wake wamrudishe kwenye gari lake.
Alipandishwa kwenye gari aina ya Toyota Land Cruiser lenye namba za usajili T 631 AHD.
Akizungumzia tukio hilo, mwanasheria wake John Mallya alisema baada ya hali ya Askofu Gwajima kuonekana si shwari, alikwenda kuripoti kwa mkuu wa upelelezi.
Mallya alisema baada ya kutoa taarifa hiyo, aliruhusiwa kurudi nyumbani.
Alisema Askofu Gwajima anatakiwa kuripoti tena Aprili 20 kwa ajili ya kuhojiwa.
“Askofu Gwajima ameruhusiwa kurudi nyumbani kwa ajili ya mapumziko hadi afya yake itakapoimarika, tumeambiwa arudi kuripoti Aprili 20,” alisema Mallya.
Akizungumzia tukio la kuahirishwa kutoa maelezo, Kamishna Msaidizi Mwandamizi wa Polisi ambaye pia ni Mkuu wa Upelelezi Kanda Maalumu ya Dar es Salaam, ACP Constantine Massawe, alisema Askofu Gwajima alidai hali yake si nzuri, bado ni mgonjwa.
“Askofu Gwajima amesema anaumwa… kama anajisikia vibaya tunamwacha kwanza apate nafuu, baada ya Sikukuu ya Pasaka tumemtaka arudi kituoni hapa,” alisema.

KAMANDA KOVA
Naye Kamanda wa Polisi Kanda Maalumu ya Dar es Salaam, Kamishna Suleimani Kova, alisema hawakuweza kumhoji Askofu Gwajima ili kumpa fursa afya yake iimarike zaidi.
Alisema Askofu Gwajima alifika Kituo Kikuu cha Polisi akisindikizwa na wasaidizi wake, saa 2 asubuhi.
“Alifika kituoni akiwa bado anatumia kiti cha magurudumu matatu (wheel chair) na alikubaliana na wapelelezi akaendelee kwanza na matibabu.
“Gwajima anatakiwa kurudi kuripoti Aprili 20, mwaka huu ili aendelee na mahojiano juu ya tuhuma za kumkashifu na kumtukana Askofu wa Kanisa Katoliki Jimbo Kuu la Dar es Salaam, Mwadhama Polycarp Kardinali Pengo,” alisema Kova.
Askofu Gwajima alizimia wiki iliyopita wakati akihojiwa katika Kituo Kikuu cha Polisi Kanda Maalumu ya Dar es Salaam, kisha kupelekwa Hospitali ya Polisi Kurasini ambako aligoma kutibiwa.
Baada ya hapo alihamishiwa Hospitali ya Taifa ya Muhimbili ambako pia hakukubaliana nako ndipo akahamishiwa Hospitali ya TMJ iliyopo Mikocheni.




https://ssl.gstatic.com/ui/v1/icons/mail/images/cleardot.gif

Serikali ya Salim Amri BVR



NA WAANDISHI WETU, DAR ES SALAAM
HATIMAYE Tume ya Taifa ya Uchaguzi (NEC) imesitisha kwa muda usiojulikana upigaji kura ya maoni kwa Katiba Inayopendekezwa uliokuwa umepangwa kufanyika Aprili 30.
NEC imesema imefikia uamuzi kutokana na kushindwa kukamilisha kwa wakati uliopangwa uboreshaji daftari la kudumu la wapigakura.
Kutokana na hatua hiyo, sasa Katiba hiyo itapigiwa kura baada ya kukamilika uandikishaji katika daftari la kudumu la wapigakura kwa mfumo wa kielektroniki (BVR) Julai, mwaka huu.
Kuahirishwa kura ya maoni kumekuja baada ya malalamiko ya watu mbalimbali, wakiwamo wanasiasa na viongozi wa dini kuhusu kusuasua uandikishwaji wapigakura na muda wa kuipigia kura Katiba Inayopendekezwa kuwa mfinyu.
Akizungumza na waandishi wa habari Dar es Salaam jana, Mwenyekiti wa NEC, Jaji Damian Lubuva, alisema baada ya kukamilisha uandikishaji, NEC itakutana na Tume ya Uchaguzi ya Zanzibar (ZEC) kwa ajili ya kupanga siku ya kupiga kura ya maoni ya Katiba Inayopendekezwa.
Alisema NEC imetangaza kuahirishwa kwa upigaji kura kutokana na kusuasua kwa uandikishaji wa daftari hilo mkoani Njombe.
Jaji Lubuva alisema walitegemea uandikishaji wa daftari hilo ungemalizika  Aprili 12, mwaka huu  na upigaji kura za maoni ungefanyika Aprili 30, muda uliolalamikiwa na wadau wengi kuwa hautoshi.
Alisema katika kipindi hiki ambacho kura ya maoni imesitishwa, wananchi wana nafasi kubwa ya kuisoma Katiba hiyo ili waweze kujitokeza na kupiga kura.
“Kwavile kazi ya uboreshaji daftari la kudumu la wapigakura ni la msingi na bado halijakamilika, tumelazimika kusogeza mbele ili kuhakikisha tunamalizia kazi hii ndipo tuanze kazi ya upigaji wa kura.
“Ili tuweze kurahisisha shughuli hiyo, Serikali imenunua jumla ya vifaa 248 kwa awamu ya pili na awamu ya tatu vifaa 1,600 ambavyo vitatumika mikoa iliyobaki kwa ajili ya kuendelea na zoezi hilo,” alisema Jaji Lubuva.
Alisema hadi sasa NEC inategemea kumaliza kazi hiyo mkoani Njombe Aprili 18 ili waweze kuendelea na uandikishaji katika mikoa ya Ruvuma, Iringa, Mtwara na Lindi kama ilivyopangwa.
Aliwataka wanasiasa kuwahamasisha wananchi kwenye mikoa tajwa wajitokeze kwa wingi kujiandikisha kwenye daftari hilo ili waweze kuwa na haki ya kupiga kura.
“Tunawaomba wanasiasa washirikiane na NEC ili kuwahamasisha wananchi kujitokeza katika mikoa iliyotajwa ili waweze kujiandikisha kwenye daftari hilo, jambo ambalo linaweza kuwasaidia kupiga kura kwenye chaguzi mbalimbali zijazo,” alisema Jaji Lubuva.
Alisema zaidi ya Sh bilioni 11 zimetumika kununua vifaa vitakavyotumika kuendeshea shughuli hiyo, na kwamba Serikali haidaiwi kiasi chochote cha fedha.
“Tumetumia dola za Marekani milioni 72 kununua vifaa vya uandikishaji, tunaamini vifaa vilivyobaki vitakapofika nchini, kazi hii itakuwa rahisi.
“Taarifa kwamba Serikali inadaiwa si za  kweli, vifaa vyote vimelipiwa na kilichobaki vinafika kwa awamu.
 “Taarifa kuwa tulinyimwa vifaa kutoka Kenya na Nigeria hazina ukweli kwa sababu Tanzania na nchi nyingine za Kusini mwa Afrika (SADC), zina utaratibu wa kushirikiana katika shughuli mbalimbali za kimaendeleo,” alisema.
Alisema NEC iliomba vifaa hivyo kwa ajili ya kuvitumia kwenye uandikishaji, lakini walishindwa kuvipata kutokana na kutumika kwenye shughuli nyingine.

JOHN CHEYO
Hata hivyo, Mwenyekiti wa Kituo cha Demokrasia Tanzania (TCD), John Cheyo ambaye pia ni Mbunge wa Bariadi Mashariki, alisema uamuzi wa NEC kusogeza mbele upigaji kura ya maoni ni wa msingi kwa sababu muda uliopangwa awali ulikuwa hautoshi.
Cheyo alisema NEC ilipaswa kulitangaza suala hilo mapema ili kuondoa malalamiko yaliyojitokeza kwa wanasiasa na wananchi.
Alisema kutokana na hali hiyo, TCD itashirikiana na NEC kuhakikisha wanapunguza malalamiko.
“Tulijua muda uliopangwa awali na NEC hautoshi na tulijaribu kuwaambia wasogeze mbele lakini waligoma, matokeo yake wameamua kutangaza wenyewe.
“Kutokana na hatua hiyo, tunawaunga mkono kwa uamuzi huo kwa sababu umeondoa wingu lililotanda la kuwapo kwa sintofahamu ya kufanyika kwa kura ya maoni kama ilivyokuwa imepangwa,” alisema Cheyo.
Kabla ya kuahirishwa jana, wadau mbalimbali walishauri kusogezwa mbele ili uandikishaji ufanyike kwa weledi kutokana na kusuasua katika hatua za awali mkoani Njombe.

VURUGU BUNGENI
Mapema wiki hii, wabunge wa upinzani walisababisha kuvunjika kwa kikao cha Bunge mjini Dododoma baada ya kumtaka Waziri Mkuu, Mizengo Pinda atoe kauli juu ya mustakabali wa uandikishaji wapigakura na hatima ya kura ya maoni.
Mbunge wa Ubungo, John Mnyika (Chadema), Mbunge wa Kasulu Mjini, Moses Machali (NCCR-Mageuzi) na Mbunge wa Kisarawe, Selemani Jafo (CCM), ndio waliokuwa vinara wa mjadala huo.

JAJI BOMANI
Naye Mwanasheria Mkuu wa Serikali mstaafu, Jaji Mark Bomani, alionya endapo Katiba Inayopendekezwa itapitishwa italigawa taifa na kusababisha machafuko.
Aliishauri Serikali kusitisha kupiga kura ya maoni Aprili 30 na kuendelea na uboreshaji wa daftari la wapigakura.
Jaji Bomani pia aliitaka Serikali iachane na mfumo wa uandikishaji BVR kwa kuwa ilikurupuka bila ya kufanya maandalizi ya kutosha na fedha na vifaa havitoshi kuendeshea mpango huo.

JAJI WARIOBA
Januari 20, mwaka huu Mwenyekiti wa iliyokuwa Tume ya Mabadiliko ya Katiba, Jaji Joseph Warioba, alionya muda wa upigaji kura ya maoni kwa Katiba Inayopendekezwa hautoshi.
Jaji Warioba alisema endapo sheria ingefuatwa kwa muda wa kutoa elimu na kila kitu, basi kura ingepigwa Julai, mwaka huu.
Alisema muda uliokuwa umepangwa ni mdogo, hasa ukizingatia mwaka huu ni mwaka wa uchaguzi mkuu na wakati huo utakuwa muda wa kampeni.
Jaji Warioba alisema kuna mwingiliano unaoleta mkanganyiko katika mchakato wa kuboresha daftari la wapigakura na Sheria ya Kura ya Maoni.

KAULI YA JK
Septemba mwaka jana, Rais Jakaya Kikwete alisisitiza upigaji kura ya maoni Katiba Inayopendekezwa utafanyika Aprili 30.
Alisema upigaji wa kura utafanyika baada ya elimu na kampeni juu ya kura hiyo kuanza rasmi Machi 30, mwaka huu na kuhitimishwa Aprili 29, kama sheria ya kura ya maoni inavyoelekeza, jambo ambalo halikutimia.

MAASKOFU
Nalo Jukwaa la Wakristo Tanzania (TCF) liliendelea kushikilia msimamo wake wa kuwashinikiza waumini kuipigia kura ya hapana Katiba Inayopendekezwa.
Jukwaa hilo lilisema Katiba Inayopendekezwa imefika hapo ilipo kwa njia ya ubabe na kukosa uadilifu.


Tuesday, March 31, 2015

Kaseja atinga Mazoezini na Baiskeli

Golkipa Juma Kaseja akiwa mazoezi ya kozi ya ukocha

SIMON MSUVA AFUMANIWA AKILA DENDA HADHARANI

msuva akila denda na mwanamke wake

Ukosefu wa TBS Mpaka wa Kasumulu ni tatizo kwa Walaji




Naibu waziri wa Viwanda na Biashara , Janeth Mbene, akizungumza na Meneja wa Mamlaka ya mapato mkoa wa Mbeya, Joseph Ruge, katika ofis za TRA Kasumulu. Picha na Humphrey Shao



Na Humphrey Shao, Kyela
MPAKA wa Kasumulu ni  moja ya mipaka ambayo inaingiza fedha nyingi katika serikali kupitia kodi ya mapato na tozo mbalimbali, mpaka huu una urefu wa kilometa 32 kutoka wilaya ya Ileje upande magharibi hadi ziwa Nyasa upande wa mashariki katika wilaya ya Kyela.
Mpaka huu ambao una vivuko visivyo rasmi vipatavyo 32 ambavyo hutumika  kuvusha bidhaa za magendo ambazo uchangia kwa kiasi kikubwa kupotea kwa mapato na bidhaa ambazo azina viwango kwa matumizi hapa nchini
Hivi karibuni Naibu Waziri wa Viwanda na Biashara, Janeth Mbene, akiwa na maofisa waandamizi wa shirika la Viwango nchini(TBS),walitembelea mpaka huo hili kujionea namna shughuli zinavyofanyika katika mpka huo.
Akiwa katika mpaka huo Waziri mbene aliweza kujionea na namna tasisi mbalimbali zinavyofanya kazi na kupata ripoti ya tasisi mama katika eneo hilo mamlaka ya mapato nchini(TRA).
Waziri Mbene alibaini kuwa licha ya kuwepo tasisi kadhaa za serikali katika eneo hilo lakini bado kuna upungufu wa kutokuwepo kwa shirika la viwango nchini(TBS) Katika eneo hilo hali inayo hatarisha maisha ya walaji wa bidhaa zianazopita katika mpaka huo licha ya kulipiwa ushuru.
Waziri mbene amelitaka shirika la Viwango Tanzania (TBS) Kuakikisha kuwa wanaweka kituo cha ukaguzi katika mpaka wa Kasumulu kwa haraka katika eneo hilo kutokana na mahitaji ya mpaka huo ambao upitisha bidha akutoka nchi za Malawi na Afrika Kusini.
Mbene anasema kuwa kumekuwa na tatizo la kusambaa kwa bidhaa katika masoko ya nyanda za juu kusini ambayo yanapitishwa katika mpaka wa Kasumulu hali inayochangia kwa bidhaa za ndani kukosa masoko .
“Serikali yote iko hapa hivyo ni aibu kuona kuwa atuna kituo cha tbs katika mpaka huu kwani hii ni moja ya lango kuu la uingizaji bidhaa kwa ajili ya mikoa ya nyanda za juu kusini kutokea nchi jirani ya Malawi na Afrika kusini kama nilivyoelezwa kwenye ripoti ya TRA” alisema Waziri Mbene.
Akieleza mbele  ya naibu waziri Afisa habari wa TBS, Roida Andusamile, alisema kuwa shirika hilo lipo katika mchakato wa kuweka kituo katika kituo hicho hili kupunguza tatizo la uingizwaji wa bidhaa ambazo azikidhi viwango.
Roida anasema kuwa wao kama maofisa wa TBS wameona namna mpka huo ulivyokuwa na umuhimu wa kuwekewa kituo cha ukaguzi kama ilivyo katika bandari na vituo vingine kwani biashara ya bidhaa na vyakula ni kubwa kuliko kawaida.
Kwa upande wake Kaimu afisa mfawidhi forodha Kasumulu Delya Yohana anasema katika kipindi chote wamekuwa katika mapambano makali juu ya uingizwaji wa pombe za viroba kutoka nchini Malawi.

Anasema kuna kila sababu ya TBS kuwepo kwani bidhaa za vilelevi zimekuwa zikiingia na kulipiwa ushuru licha ya baadhi kupigwa marufuku kutokana na uwepo tasisi ya chakula na lishe ya TFDA kubaini kuwa vina kemikali mbaya.

Alitaja kuwa idadi ya magari yanayoingia katika kituo hicho kuanzia mwezi Desemba ni magari yaliyoingia ni 1389 na yaliyotoka ni 592 na thamni ya mizigo iliyokwenda nje kama export ilikuwa sh11,833,414,899.
Alitaja kuwa kudorola kwa uchumi wa Malawi kumechangia kwa kiasi kikubwa kushuka kwa baishara katika mpaka huo ambao unategemewa kama lango kwa nchi jirani.
Alitaja kuwa mizigo inayotoka nje ya nchi na bidhaa zinazouzwa nchini Malawi ni Saruji kutoka mbeya , Sabuni,bidhaa za majumbani,Mafuta ya kupaka, Mafuta ya kupikia na Juice za Azam.

Mizigo inayoingia nchini kwa wingi ni vipuri vya Viwandani hasa vile vya kiwanda cha Sukari cha Kilombero, bidhaa zingine ni mbao kutoka nchini Malawi, Mashudu ya kulishia wanyama na Vipodozi.
Anasema kuna mpango wa kujenga kituo kimoja cha Forodha kijulikanacho kama OSBP(One stop Border Post) Katika mpaka wa Kasumulu Faida ya mradi huu ni pamoja na kupunguza muda wa kuingiza na kutoa mizigo na kudhibiti magendo ulinzi na usalama mpakani.

mwisho

JK AWATAKA WASANII WA BONGO MOVIE KUJIONGEZA NA KUACHA KULALAMIKIA SERIKALI

 Rais Mstaaafu wa Awamu ya Nne Dk Jakaya Mrisho Kikwete, akizungumza wakati wa uzinduzi Televisheni  inayoshughulika na masuala ya filamu...